Политика за дисеминација
Политиката за дисеминација е документ што е во согласност со постојните стратегиски документи на Државниот завод за статистика: Стратегискиот план, Стратегијата за дисеминација и Политиката за квалитет. ДЗС вложува континуирани напори за да обезбеди ефикасна дисеминација на своите производи и услуги.
За податоците да станат достапни за корисниците, потребно е голем број бази на податоци, прибрани од статистичките истражувања, да се трансформираат во концизни и релевантни информации што ќе станат достапни за корисниците преку различни дисеминациски производи. На овој начин, ДЗС ги задоволува потребите на различни групи корисници, а пред сè, ја исполнува главната задача на официјалната статистика за развој, производство и дисеминација на статистички податоци на непристрасен, објективен, професионален и транспарентен начин, со третирање на сите корисници на еднаков начин.
ДЗС е посветен на обезбедување висококвалитетни, навремени и меѓународно споредливи податоци за состојбите и движењата во економијата, демографијата и општеството, кои се неопходни за донесување одлуки и за креирање политики, како и за научноистражувачки цели.
Дисеминацијата, исто така, има улога и во подобрувањето на статистичката писменост на јавноста.
За да се постигнат овие цели, објавувањето на податоците треба да биде во согласност со:
- Законот за државната статистика;
- Програмата за статистички истражувања;
- Стратегијата за дисеминација;
- Политиката за квалитет;
- Кодексот за работа на европската статистика;
- други интерни упатства и процедури.
Земајќи ги предвид заедничките практики за дисеминација и националните потреби, ДЗС во својата активност за дисеминација работи врз основа на следниве принципи: релевантност, достапност и јасност, непристрасност и објективност, навременост и точност, кохерентност, споредливост и доверба.
Документот можете да го превземете на следниот линк: Политика за дисеминација.