ДЗС како дел од СДДС Плус
На 28 јануари 2019 година Република Северна Македонија стана дел од Специјалниот систем за дисеминација на податоци Плус на Меѓународниот монетарен фонд (SDDS Plus - Special Data Dissemination Standards Plus).
Државниот завод за статистика, како координатор, заеднички со Народната банка на Република Северна Македонија и Министерството за финансии, успешно го минаа подготвителниот период за вклучување во Специјалниот систем за дисеминација на податоци Плус на ММФ и обезбедија ажурирани податоци за креирање на национална страница со податоци. Целиот процес беше следен, коментиран и одобрен од ММФ.
Националната страница со податоци е поставена на веб-страницата на Државниот завод за статистика на Република Северна Македонија и вклучува макроекономски податоци (категории на податоци) што се однесуваат на четирите сектори на националната економија: Реален сектор, Фискален сектор, Финансиски сектор, Надворешен сектор, како и на делот за Население. Националната страницa со податоци вклучува дисеминација на сите категории на податоци во формат SDMX, што е особено соодветно за компјутеризирана обработка на податоците.
Националните метаподатоци (методолошки основи на податоците) се поставени на веб-страницата на Билтенот за специјални стандарди за дисеминација на ММФ – DSBB website.
На страницата на ММФ, исто така, е достапен и календарот за навремено објавување на податоците (IMF's website) што содржи информации за роковите на објавување на податоците за четири месеци однапред (за тековниот месец и за следните три месеци).