Плодна соработка на Државниот завод за статистика со ММФ за развој на официјалната статистика

Во Државниот завод за статистика се одржа плоден и конструктивен работен состанок со претставници на мисијата за членот 4 од Статутот на Меѓународниот монетарен фонд (ММФ) од Вашингтон.

На состанокот беа разгледани клучни статистички индикатори, со посебен акцент на бруто-домашниот производ (БДП) цените и инфлацијата, демографските движења и миграциските трендови. Претставниците на ДЗС ги презентираа најновите податоци и методолошки пристапи, при што беше потврдена важноста на квалитетните и навремени статистики за поддршка на економските анализи и креирањето политики.

Македонија е земја членка на СДДС плус, највисокиот статистички стандард на ММФ, а Државниот завод за статистика е национален координатор на процесот. Националната страница со податоци е поставена на веб-страницата на Државниот завод за статистика и вклучува макроекономски податоци што се однесуваат на четирите сектори на националната економија: реалниот сектор, фискалниот сектор, финансискиот сектор, надворешниот сектор, како и на делот за население.

Националната страница со податоци овозможува дисеминација на сите категории  податоци во формат SDMX, што е особено соодветно за компјутеризирана обработка на податоците.

Националните метаподатоци, кои ја опишуваат методолошката основа на податоците, се достапни во Билтенот за специјални стандарди за дисеминација на ММФ (DSBB).

Државниот завод за статистика ќе ја продолжи  активната соработка со ММФ во областа на официјалната статистика, со цел постојан напредок и развој на Националниот статистички систем.