Претставници на Државниот завод за статистика учествуваа на Европската конференција за квалитет во официјалната статистика Q2026

Директорот на Државниот завод за статистика, д-р Дејан Станков и Билјана Ристевска-Карајовановиќ, раководител на одделение, учествуваа на 12. Европска конференција за квалитет во официјалната статистика (Q2026), која се одржа од 3 до 5 јуни 2026 година во Шибеник, Република Хрватска.

Конференцијата, организирана од Хрватскиот завод за статистика и Евростат, е еден од најзначајните европски настани посветени на квалитетот во официјалната статистика и претставува форум за размена на знаења, искуства и добри практики меѓу претставници на националните статистички институции, академската заедница и меѓународните организации. Под мотото „Official Statistics: Enhancing Trust, Shaping the Future“, конференцијата беше посветена на унапредувањето на довербата во официјалната статистика, новите предизвици поврзани со користењето административни и алтернативни извори на податоци, примената на вештачката интелигенција во статистиката, како и на институционалните рамки за управување со квалитетот во официјалната статистика.

Во рамките на конференцијата, претставниците на Државниот завод за статистика учествуваа и со стручен труд на тема „Интегрирање на податоци: Искуството на ДЗС со Националната платформа за интероперабилност“. Во трудот се презентирани искуствата на Заводот во користењето на Националната платформа за интероперабилност како алатка за поефикасно поврзување и интегрирање на административните податоци, подобрување на квалитетот на статистичките производи и намалување на оптоварувањето на извештајните единици.

Учеството на Државниот завод за статистика на Q2026 претставува значаен придонес кон меѓународната размена на знаења и искуства во областа на официјалната статистика, како и потврда на заложбите на институцијата за примена на современи методологии, иновации и европски стандарди за квалитет во статистичкото производство.