Статистиката како алатка за еднаквост: Државниот завод за статистика на конференцијата „EqualXchange“

Директорот на Државниот завод за статистика, г. Дејан Станков, на 13.06.2025  година, учествуваше како говорник на четвртата годишна конференција организирана од Асоцијацијата за е-трговија на Македонија (АЕТМ), подружница Алијанса за родова еднаквост (ГЕА), на тема „EqualXchange: Empowering Ideas, Inspiring Journeys“. 

Г. Станков направи осврт на последните национални податоци поврзани со родовата еднаквост, за напредокот постигнат досега, тековните предизвици и идните насоки, а пред присутните го промовира и најновото издание на публикацијата „Жените и мажите во Северна Македонија, 2025“, која содржи важни информации и родово разделени податоци за областите како што се образованието, здравството, вработувањето и учеството во донесувањето одлуки.

Меѓу другото, тој истакна дека конференцијата има големо значење за Државниот завод за статистика бидејќи овозможува да се презентираат значителни статистички индикатори произведени од ДЗС, а кои се основа за јавна дебата и донесување одлуки засновани на докази со цел унапредување на еднаквите можности во нашето општество. 

Конференцијата претставува важен чекор кон унапредување на процесите на донесување информирани одлуки, што е од суштинско значење за постигнување одржлив развој и подобрување на квалитетот на животот на граѓаните.