Европскиот ден на статистиката го одбележавме заедно со студентите

Државниот завод за статистика го одбележа Европскиот ден на статистиката, 20 октомври, со учество на настан организиран од Економскиот факултет, посветен на младите, статистичката писменост и можностите што ги нудат новите технологии во користењето на официјалните статистички податоци.

Оваа година, кога се одбележува десетгодишнината од Европскиот ден на статистиката, посебен акцент беше ставен на приближувањето на статистиката до студентите и на зајакнувањето на соработката со академската заедница.

Во современиот свет, податоците претставуваат нов капитал, а знаењето како да се користат е една од најважните вештини на денешницата. Токму затоа, статистичката писменост станува неопходна не само за професионалците, туку и за сите млади луѓе кои сакаат да ги разберат економските и општествените процеси, критички да ги оценуваат информациите и да носат одлуки засновани на факти.

Настанот беше искористен да се претстави Статистичкиот асистент на Државниот завод за статистика – MakStatAI, иновативно решение засновано на вештачка интелигенција, кое Заводот го развива со цел да го олесни и модернизира пристапот до официјалните статистички податоци.

Алатката ја претстави директорот на Државниот завод за статистика, д-р Дејан Станков, истакнувајќи ги можностите што ги нуди примената на вештачката интелигенција во дисеминацијата на статистичките податоци.

Претставувањето на оваа алатка пред студентите има особено значење, бидејќи покажува дека статистиката не е само збир од табели и бројки, туку динамична област која се развива заедно со технологијата и нуди нови можности за истражување, учење и донесување одлуки.

Со учеството на настанот, Државниот завод за статистика ја потврдува својата заложба за унапредување на соработката со академската заедница, промовирање на статистичката писменост и поттикнување поголем интерес за официјалната статистика кај младите.

Целта е оваа иницијатива да прерасне во традиционален годишен настан, кој ќе создава простор за средби и размена на знаења меѓу статистичарите, професорите и студентите. Намерата е младите да ја доживеат статистиката не само како наставна дисциплина, туку како интересна, достапна и корисна алатка за разбирање на светот околу нив.

Годинешното мото на Европскиот ден на статистиката, „Европската статистика на крстопат: приоритети, можности и ограничувања“, дополнително ја нагласува потребата од приспособување на официјалната статистика кон новите технологии и потребите на корисниците.

Со развојот на MakStatAI и со активности насочени кон младите, Државниот завод за статистика прави чекори кон статистика која е поблиска, поразбирлива и подостапна за сите.