ДЗС и УНИЦЕФ заедно за зајакнување на податоците за децата и жените во Северна Македонија

Државниот завод за статистика (ДЗС) и УНИЦЕФ потпишаа Меморандум за разбирање со кој официјално започнува подготовката за новиот циклус на Мултииндикаторското кластерско истражување (MICS 2027) во Северна Македонија. Ова партнерство го потврдува заедничкото залагање за обезбедување квалитетни, меѓународно споредливи податоци што ќе помогнат во креирањето јавни политики засновани на факти и докази.

Истражувањето MICS е едно од најсеопфатните во светот и обезбедува детални податоци за здравството, исхраната, образованието, раниот детски развој, заштитата на децата, попреченоста, родовата еднаквост и условите за живот. Податоците се расчленети според полот, возраста, местото на живеење и социјалниот статус, што овозможува креаторите на политики да разберат каде постојат нееднаквости и како најдобро да се распределат ресурсите.

Директорот на ДЗС, д-р Дејан Станков, при потпишувањето на овој Меморандум,  истакна дека преку оваа соработка со УНИЦЕФ, ги зајакнуваме националните капацитети за спроведување големи истражувања кај домаќинствата и им обезбедуваме пристап до квалитетни податоци на носителите на одлуки, како и дека MICS 2027 ќе обезбеди важни сознанија за условите за живот на децата и жените и ќе придонесе за јавни политики што се базираат на квалитетни информации.

Повеќе од две децении MICS претставува клучен извор на податоци за состојбите со кои се соочуваат децата и жените во Северна Македонија, вклучувајќи ги тука и децата и жените во ромските населби. Овие истражувања помогнаа нееднаквостите да станат видливи и овозможија креирање понасочени и поефективни политики и програми.

Претставничката на УНИЦЕФ, г-ѓа Лесли Милер, пак, изјави дека секое дете е важно и секое дете треба да биде евидентирано. Таа нагласи дека MICS7 ќе обезбеди ажурирани и кредибилни податоци за следење на напредокот и за дизајнирање насочени интервенции, особено за децата што се изложени на ризик.

Истражувањето ќе се спроведува под водство на ДЗС, со техничка поддршка од УНИЦЕФ, а во согласност со глобалните стандарди за квалитет на податоците, етичките принципи и меѓународната споредливост.