Делегација на Државниот завод за статистика учествуваше на 57. сесија на Статистичката комисија на ООН во Њујорк

Делегација на Државниот завод за статистика предводена од директорот, д-р Дејан Станков, учествуваше на 57. сесија на Статистичката комисија на ООН, која се одржа во периодот од 3 до 6 март во седиштето на ООН во Њујорк, САД. Ова е највисокиот орган во меѓународниот статистички систем, кој ги разгледува и одобрува глобалните статистички стандарди и традиционално ги собира директорите на статистичките институции од сите 193 земји членки на Организацијата.

Во рамките на состанокот беа разгледани клучни прашања поврзани со развојот на официјалната статистика во сите статистички области, вклучително и националните сметки, статистиката за животната средина и климатските промени, социјалната и демографската статистика, статистиката за здравството, управувањето со податоци, истражувањето на благосостојбата, Целите за одржлив развој на ООН и други.

Претставниците на ДЗС учествуваа и на повеќе придружни настани, кои традиционално ѝ претходат или се одржуваат паралелно со сесијата на Комисијата. Особен интерес предизвика подготвеноста за користење на вештачката интелигенција во официјалната статистика и до кој степен корисниците добиваат точни, навремени и релевантни статистички податоци при користење на ВИ. Оваа тема е поврзана со зачувување на интегритетот на официјалната статистика како глобално јавно добро во свет управуван од вештачката интелигенција.

Друго важно случување беше форумот на тема „Повеќе од БДП: преиспитување на напредокот во свет што се менува“, при што беа разгледани можностите за развој на дополнителни индикатори кои би се користеле заедно со бруто-домашниот производ (БДП) со цел попрецизно да се прикажат економските, социјалните, еколошките и институционалните димензии на одржливиот развој.

Покрај формалните сесии, неделата беше одбележана и со низа билатерални средби со директори на статистички заводи и меѓународни организации. Овие средби овозможуваат зајакнување на партнерствата, идентификување на заедничките приоритети и продлабочување на соработката во рамките на глобалната заедница за податоци и статистика.

Дополнително, во пресрет на 57. сесија на Статистичката комисија на Обединетите нации, г. Станков присуствуваше на состанокот на Групата на високо ниво за партнерство, координација и градење капацитети за статистика за Агендата за одржлив развој 2030.

Состанокот претставуваше важна можност за оваа група на високи раководители од заедницата на официјалната статистика да ги разгледа подготовките за Светскиот форум за податоци на ООН, вклучително и напредокот постигнат во однос на логистичките подготовки, претпрограмата („Патот кон Ријад“) и програмата, завршниот документ, како и изборот на следниот домаќин.

Групата, исто така, ги разгледа следните чекори за спроведување на Рамката од Меделин и активностите поврзани со финансирањето на развојот, вклучително и подготовките за Форумот за финансирање на развојот во 2026 година. Дополнително, беа разгледани области во кои групата може да преземе поголема улога, усогласувајќи се со работата на Меѓуагенциската експертска група за индикаторите на Целите за одржлив развој (IAEG-SDGs) во рамките на иницијативата „Поуки од една деценија следење на Целите за одржлив развој: Зајакнување на глобалните рамки за забрзување кон 2030 година“.