Државниот завод за статистика учествуваше на 110-тата DGINS конференција во Сплит

Делегација на Државниот завод за статистика, предводена од директорот д-р Дејан Станков, зеде учество на Конференцијата на генералните директори на националните статистички институти во рамките на европскиот статистички систем, која се одржа во Сплит, Хрватска, на тема „Европска статистика за туризмот: иновативен и визионерски одговор на потребите на корисниците во 21 век“.

Настанот беше организиран од Државниот завод за статистика на Хрватска во соработка со Евростат и истиот претставува водечка европска платформа за размена на идеи, искуства и добри практики меѓу директорите на националните статистички институти.

Конференцијата DGINS е годишен настан што ги обединува водечките експерти од областа на статистиката од цела Европа. Таа нуди можност за размена на идеи, иновации и најдобри практики меѓу националните статистички институции. 

Целта е да се зајакне меѓународната соработка и да се најдат решенија за сложените статистички предизвици. Конференцијата, исто така, вклучува панел-дискусии и можности за вмрежување.

На 24 октомври 2025 година, во рамките на престојот во Сплит, директорот на Државниот завод за статистика, д-р Дејан Станков, оствари билатерална средба со директорката на Државниот завод за статистика на Хрватска, г-ѓа Лидија Брковиќ, по повод одбележувањето на 150-годишнината од основањето на хрватскиот Завод за статистика. На средбата, двајцата директори разменија мислења и искуства за актуелните предизвици и приоритети во статистичката работа и истакнаа дека остануваат отворени за продолжување и унапредување на одличната соработка меѓу двете институции.

Државниот завод за статистика редовно учествува на конференциите на DGINS, со цел да ги следи најновите европски статистички трендови, да разменува искуства со институции од европскиот статистички систем и да ги применува најдобрите практики во македонското статистичко производство.