Едукативна средба со учениците од втора година при СОЕУ „Јане Сандански“ – Битола

Во рамките на активностите за унапредување на статистичката писменост кај младите, на 29 април 2026 година, Државниот завод за статистика беше домаќин на ученици и професори од СОЕУ „Јане Сандански“ од Битола.

За време на посетата, учениците имаа можност подетално да се запознаат со улогата на Заводот како главен носител на официјалната статистика во државата, како и со неговото значење во процесите на прибирање, обработка и дисеминација на податоци.

Преку интерактивна презентација, им беа претставени клучните статистички процеси и современите алатки што се користат во работата, со посебен акцент на веб-страницата на Заводот и базата на податоци МакСтат. Учениците имаа можност и практично да научат како да пристапат до релевантни статистички информации и како истите да ги применат во рамките на нивните наставни активности по економија и статистика.

Посетата помина во интерактивна атмосфера, со активна вклученост на учениците преку прашања и дискусии, како и преку миниквиз, што придонесе за поголемо разбирање на значењето на статистиката во современото општество.

Државниот завод за статистика и понатаму ќе продолжи со вакви едукативни активности, со цел да го поттикне интересот кај младите за користење и правилно толкување на статистичките податоци.