Официјалната статистика како клучен елемент во јакнењето на родовата еднаквост

На 12.12.2025 година, директорот на Државниот завод за статистика учествуваше на панел-дискусија организирана од UN Women – Скопје, посветена на зајакнување на националните механизми за родова еднаквост преку политики, ресурси, отчетност и инклузивност.

Во своето излагање, директорот истакна дека унапредувањето на родовата еднаквост бара интегриран и одржлив пристап, заснован на силна правна и стратегиска рамка, соодветни институционални капацитети и јасни механизми за следење на ефектите од политиките. Посебен акцент беше ставен врз улогата на официјалната статистика како независен и веродостоен извор на квалитетни, навремени и родово прикажани податоци.

Беше нагласено дека официјалната статистика овозможува мерење на реалниот напредок преку јасно дефинирани родови индикатори и претставува темел на отчетноста и транспарентноста. Во таа насока, директорот ја потенцира потребата од понатамошно унапредување на родовата статистика преку зајакнување на административните извори на податоци, нивна дигитализација и усогласување со стандардите на Европската Унија.