Потпишана Декларација за партнерство за формализација на неформалната економија во Северна Македонија

На 18.02.2026 година, во рамките на Годишната конференција „Формализација на неформалната економија: Преку соработка до успех“, беше потпишана Декларацијата за партнерство и акција, со цел зајакнување на соработката меѓу институциите за формализација на неформалната економија во Северна Македонија. 

Неформалната економија има значително влијание врз јавните финансии, конкурентноста на пазарот и социјалната правда. Со потпишувањето на Декларацијата, институциите се обврзаа на заедничка работа за намалување на сивата економија, унапредување на институционалните механизми за контрола и создавање пофер економска средина.

Во овој контекст, Државниот завод за статистика (ДЗС) има клучна улога во обезбедувањето навремени, точни и квалитетни статистички податоци при креирањето политики и стратегии за справување со неформалната економија, како и при анализата на нејзиниот обем и структура. Со тоа што ДЗС овозможува пристап до анонимизирани микроподатоци за научноистражувачки цели, им дава подршка на академските и истражувачките институции да спроведуваат студии за идентификација на причините и моделите на неформалната економија, а и да предложат решенија.

На конференцијата свои обраќања имаа претседателот на Владата, проф. д-р Христијан Мицкоски, министерката за финансии, м-р Гордана Димитриеска-Кочоска, министерот за економија и труд, г. Бесар Дурмиши, деканот на Економскиот факултет при Универзитет „Св. Кирил и Методиј“ – Скопје, проф. д-р Мијалче Санта, националниот координатор на МОТ за Северна Македонија, г. Емил Крстановски, како и постојаниот претставник на УНДП во земјата, г. Армен Григоријан, а беа присутни и други претставници на академската заедница, бизнис-заедницата и синдикатите.

Во согласност со Декларацијата, ДЗС ќе продолжи да ги унапредува статистичките методологии, да ги поддржува напорите за следење на ефектите од мерките против неформалната економија и да обезбедува сигурни податоци што ќе придонесат за поефикасно управување со јавните ресурси и економските политики. Потпишувањето на Декларацијата ја потврдува решителноста на сите институции да работат заедно за подобрување на економската состојба и за намалување на влијанието на неформалната економија во државата.