Потпишан договор за размена на податоци со Агенцијата за вработување

Државниот завод за статистика, во својство на координатор на Националниот статистички систем, потпиша договор за размена на податоци со Агенцијата за вработување на Република Северна Македонија.

По тој повод во Државниот завод за статистика беше одржана средба помеѓу претставници на двете институции предводени од директорите г. Дејан Станков и г. Сељатин Бељули. На средбата беа дискутирани активностите што ги преземаат во моментов и предизвиците со кои се соочуваат во секојдневната работа двете институции. 

Договорот претставува важен чекор во унапредувањето на институционалната соработка и овозможува поголема и поефикасна употреба на административните податоци за статистички цели. Со размената на податоци што ќе се реализира согласно со договорените обврски, ќе се подобрат квалитетот, навременоста и обемот на официјалната статистика, со што директно се придонесува кон креирање политики засновани на податоци.

Договорот овозможува редовен и сигурен пристап до податоци за невработеноста, слободните работни места, како и до други релевантни податоци за следење на состојбите на пазарот на трудот. Добиените информации ќе бидат искористени исклучиво за статистички цели, во согласност со Законот за државната статистика и меѓународните стандарди за заштита на податоците.

Оваа соработка е во функција на зајакнување на Националниот статистички систем и претставува уште еден важен чекор во насока на зголемување на употребата на постојните административни извори како алтернатива на традиционалните статистички истражувања, со цел ефикасно искористување на ресурсите и намалување на оптовареноста на извештајните единици.