Стратегиски план, 2025 - 2027
Стратегискиот план на Државниот завод за статистика, 2025 – 2027 е основен документ со кој се уредуваат стратегиските приоритети на Државниот завод за статистика во периодот од 2025 до 2027 година
Стратегискиот план за развој на Државниот завод за статистика за периодот 2025 – 2027 година претставува клучен документ што ги утврдува основните насоки за натамошниот развој на Заводот. Овој план не само што ги дефинира приоритетите, целите и програмите за развој, туку и ја потврдува посветеноста на интеграцијата во Европскиот статистички систем, јакнењето на институционалната структура и статистичката инфраструктура, како и развојот на стратегиските партнерства и управувањето со квалитетот. Исто така, Стратегискиот план е во согласност со стратегиските цели и приоритети на Владата на Република Северна Македонија.
За остварувањето на овие цели и приоритети, неопходна е соработка на сите релевантни фактори во статистичкиот систем, како и обезбедување неопходни ресурси – финансиски, ИТ и човечки. Производството и дистрибуцијата на точни и квалитетни статистички податоци ќе бидат клучни за поддршката на деловното планирање и донесувањето одлуки базирани врз информации и затоа во модерното време е потребно зголемено инвестирање во дигитализацијата на статистичкото производство.
Во овој контекст, потребно е да се овозможи брзо препознавање на новите трендови во различни сектори на општеството, со помош на статистиката како средство за носење подобри и поквалитетни одлуки. Статистиката ќе биде фундаментален инструмент за мониторирање на промените што се појавуваат со напредокот на технологиите, глобалните предизвици и иновациите во работењето. За оваа цел, неопходно е да инвестираме во развојот на квалитетен кадар што ќе биде во чекор со брзите технолошки и иновациски промени, како и со општествените трансформации.
Новиот предизвик за статистиката ќе биде градењето и одржувањето сложени системи за обработка на големи количества податоци, вклучувајќи и неструктурирани податоци, како и обезбедувањето високи стандарди за заштита на податоците и безбедноста при нивната обработка. Примената на построги политики за заштита на податоците ќе биде во согласност со европските регулативи, што ќе обезбеди доверливост и квалитет во статистичките процеси.
Документот можете да го преземете на следниот линк: Стратегиски план 2025-2027