U shënuan dy dekada nga vendosja e Kodit të Praktikës të Statistikës Evropiane

Me ftesë të drejtoreshës së përgjithshme të Eurostat-it, Mariana Koceva, drejtori i Entit Shtetëror të Statistikës, dr. Dejan Stankov, mori pjesë në një konferencë kushtuar 20-vjetorit të miratimit të Kodit të Praktikës së Statistikës Evropiane. Ngjarja, e organizuar nga Eurostat-i, u mbajt më 6 dhe 7 nëntor 2025 në selinë e Komisionit Evropian – “Berlaymont” në Bruksel, Belgjikë.

Në konferencë morën pjesë përfaqësues të shërbimeve statistikore kombëtare nga Sistemi Statistikor Evropian, si dhe ekspertë nga Komisioni Evropian, Parlamenti Evropian, presidenca e Këshillit të Bashkimit Evropian dhe institucione të tjera përkatëse, si edhe përdorues të të dhënave statistikore zyrtare. Ngjarja përbënte një mundësi për shkëmbim përvojash dhe vlerësimesh mbi ndikimin e Kodit në zhvillimin e statistikës evropiane, si dhe për arritjet gjatë dy dekadave të kaluara që nga zbatimi i tij.

Në kuadër të konferencës, dr. Stankov zhvilloi takime dhe biseda me përfaqësues të institucioneve statistikore nga vendet anëtare të Bashkimit Evropian, ku u shkëmbyen përvoja të lidhura me përmirësimin e pavarësisë profesionale dhe forcimin e besimit në statistikat zyrtare.

Kodi i Praktikës së Statistikës Evropiane përbëhet nga 16 parime dhe 84 tregues, të cilat përcaktojnë standardet për zhvillimin, prodhimin dhe shpërndarjen e statistikave evropiane. Parimet përfshijnë kuadrin institucional, proceset statistikore dhe rezultatet, ndërsa të gjitha organet statistikore kombëtare që përgatisin statistika evropiane janë të detyruara t’i respektojnë dhe t’i zbatojnë këto standarde.