Продолжува успешната соработка меѓу Државниот завод за статистика и Чешкиот завод за статистика

На 6 и 7 октомври 2026 година, делегација на Државниот завод за статистика, предводена од директорот, д-р Дејан Станков, оствари дводневна работна посета на Чешкиот завод за статистика во Прага, во рамките на долгогодишната билатерална соработка меѓу двете институции.

Делегацијата оствари средба со претседателот на Чешкиот завод за статистика, Марек Ројичек.
Во фокусот на средбата беа можностите за натамошно продлабочување на институционалната соработка, размената на искуства и добри практики, како и унапредувањето на статистичките процеси и методологии.

Во текот на дводневната посета беа разгледани повеќе значајни области од официјалната статистика, меѓу кои статистиката на цените, со посебен осврт на индексите на цените на производителите на индустриски производи и услуги, анкетните истражувања на домаќинствата и нивната техничка поддршка, како и националните сметки.

Посебно внимание беше посветено на брзите процени на бруто-домашниот производ, подготовките за имплементација на новиот Европски систем на сметки ЕСС 2030, ревизијата на Националната класификација на дејности, статистиката на владините финансии и функционирањето на статистичкиот деловен регистар.

Разговорите овозможија размена на стручни искуства и согледување на можностите за примена на современи методолошки решенија, како и за идентификување области од заеднички интерес за идна соработка.

Оваа посета претставува продолжение на долгогодишното успешно партнерство меѓу двете национални статистички институции и ја потврдува заедничката определба за натамошно јакнење на професионалните врски, размената на знаења и унапредувањето на квалитетот на официјалната статистика.

Државниот завод за статистика останува посветен на развивањето на меѓународната соработка и усогласувањето со европските статистички стандарди, во насока на обезбедување навремени, квалитетни и веродостојни статистички податоци за потребите на корисниците.