Отворен нов Центар за обука со поддршка од Шведската статистика

На 9 април 2025 година, во просториите на Државниот завод за статистика беше свечено отворен новиот Центар за обука, реализиран со поддршка на Статистичкиот завод на Шведска преку програмата за развојна соработка на Шведската агенција за меѓународен развој – SIDA.
Центарот претставува современ простор за обука, размена на знаења и професионален развој во областа на официјалната статистика, наменет како за вработените во Заводот така и за надворешни соработници, академски истражувачи, новинари и за сите заинтересирани корисници на статистички податоци.

Со отворањето на овој центар, Државниот завод за статистика прави важен чекор напред за зајакнување на институционалните капацитети, унапредување на статистичката култура и приближување кон европските и меѓународните стандарди за продукција и дисеминација на податоци.

На свеченото отворање присуствуваа директорот на Државниот завод за статистика, д-р Дејан Станков и вработени од Заводот, амбасадорката на Кралството Шведска во Северна Македонија, 
г-ѓа Ами Ларсон Џеин, со претставници од амбасадата, експертите ангажирани од Статистичкиот завод на Шведска во овој проект, г-ѓа Мај Ериксон Готе и г. Ларс Јохан Содерберг, како и партнерите што учествуваат во развојниот процес на македонскиот национален статистички систем.
Државниот завод за статистика им изразува голема благодарност на Статистичкиот завод на Шведска и на програмата SIDA за континуираната поддршка, со чија помош се реализираат стратегиските цели и развојните иницијативи во областа на македонската статистика.