Përfaqësues të Entit Shtetëror të Statistikës morën pjesë në Konferencën Evropiane për Cilësinë në Statistikat Zyrtare Q2026

Drejtori i Entit Shtetëror të Statistikës, dr. Dejan Stankov, dhe Biljana Ristevska Karajovanoviq, udhëheqëse e njësisë organizative, morën pjesë në Konferencën e 12-të Evropiane për Cilësinë në Statistikat Zyrtare (Q2026), e cila u mbajt nga 3 deri më 5 qershor 2026 në Shibenik, Republika e Kroacisë.

Konferenca, e organizuar nga Enti Kroat i Statistikës dhe Eurostat-i, është një nga ngjarjet më të rëndësishme evropiane kushtuar cilësisë në statistikat zyrtare dhe përfaqëson një forum për shkëmbimin e njohurive, përvojave dhe praktikave të mira ndërmjet përfaqësuesve të institucioneve kombëtare statistikore, komunitetit akademik dhe organizatave ndërkombëtare. Nën moton “Official Statistics: Enhancing Trust, Shaping the Future”, konferenca iu kushtua forcimit të besimit në statistikat zyrtare, sfidave të reja që lidhen me përdorimin e burimeve administrative dhe alternative të të dhënave, zbatimit të inteligjencës artificiale në statistikë, si dhe kornizave institucionale për menaxhimin e cilësisë në statistikat zyrtare.

Në kuadër të konferencës, përfaqësuesit e Entit Shtetëror të Statistikës prezantuan edhe punimin profesional me titull “Integrimi i të Dhënave: Përvoja e Entit Shtetëror të Statistikës me Platformën Kombëtare të Interoperabilitetit”. Në punim u prezantuan përvojat e Entit në përdorimin e Platformës Kombëtare të Interoperabilitetit si mjet për lidhje dhe integrim më efikas të të dhënave administrative, përmirësimin e cilësisë së produkteve statistikore dhe zvogëlimin e ngarkesës për njësitë raportuese.

Pjesëmarrja e Entit Shtetëror të Statistikës në Q2026 përfaqëson një kontribut të rëndësishëm në shkëmbimin ndërkombëtar të njohurive dhe përvojave në fushën e statistikave zyrtare, si dhe një konfirmim të përkushtimit të institucionit për zbatimin e metodologjive moderne, inovacioneve dhe standardeve evropiane të cilësisë në prodhimin statistikor.