Трета регионална конференција на сметководители и овластени сметководители „Генерација со визија – Професија со иднина“

Конференцијата, која се одржа во Скопје, обедини претставници од институции, меѓународни организации, професионалната заедница и бизнис-секторот, со цел размена на искуства и дискусија за современите предизвици во финансиското известување, дигитализацијата и примената на меѓународните стандарди.

Во рамките на панел-дискусијата посветена на меѓународните стандарди и дигитализацијата на финансиското известување, директорот истакна дека ако системите за финансиско известување се стандардизирани, дигитално структурирани и машински читливи, статистичките институции може да воспостават директни врски со овие извори на податоци. Ова ќе овозможи автоматско преземање грануларни податоци и можност за поголема аналитика,  што води кон намалување на товарот врз извештајните единици и ограничување на потребата од спроведување посебни статистички истражувања. Целта на ваквиот систем е да се применува принципот „еднаш доставени податоци – повеќекратна употреба“.

Деловното сметководство и националните сметки не се концептуално исти: едното работи со микроподатоци и сметководствени принципи, а другото со статистички агрегати и методологија SNA. Сепак, податоците од финансиските извештаи се главен извор при составување на националните сметки и затоа повисок квалитет на сметководствените податоци, усогласени со меѓународните стандарди, води кон обезбедување конзистентни и висококвалитетни статистички податоци.